Publiká riba 22 Mart 2023
Willemstad – Riba djamars 21 di mart, Minister Charles Cooper tabata presente na apertura ofisial di lusnan di kaya LED Inteligente na Caracasbaai. Minister Cooper tabata t’ei un bes mas pa inougurá di forma ofisial un área mas ku por brota di bida i iluminashon, un área mas na Kòrsou ku awor tin un kara nobo dor di nos lusnan LED inteligente.
For di aña pasá, Gobièrnu di Kòrsou huntu ku Aqualectra a bin ta iluminá diferente karetera pa outonan por kore mas sigur den oranan di anochi. Sinembargo, a pone atenshon tambe na áreanan kaminda siudadanonan ta trafiká komo peaton òf sosialisá ku otro den nos tempu liber. Un ehèmpel di esaki ta nos sentro di siudat ku awor sigur ta vibrante atrobe.
Riba 21 di mart, a toka turno na e área rondó di nos playa Caracasbaai. Un área dushi ku ta brinda oportunidatnan sosial diverso. Hopi ta bini aki diariamente den oranan di atardi sea pa landa, relahá kantu di playa, hasi ehersisio, organisá fiesta i hopi mas. Gobièrnu di Kòrsou a haña importante pa iluminá e área aki ku e lusnan LED inteligente pa asina halsa e eksperensia sosial di nos komunidat.
Fuera di iluminá e área kantu di playa a iluminá entretantu tambe henter Caracasbaaiweg, instalando mas ku 200 lusnan di kaya LED inteligente. Kemen e ruta pa kore yega na playa tambe ta kompletamente iluminá.
E aña aki Aqualectra, VVRP i MEO lo kontinuá ku e trayekto pa iluminá nos kareteranan na Kòrsou. Pa 2023 e meta ta pa instalá 10.000 mil lus di kaya LED inteligente den diferente área rònt Kòrsou.
Ta hasi un supliká na un i tur pa kòrda yuda kuida e lusnan aki ya ku nan ta un invershon grandi ku lo por bai nos sigur un par di aña.
Minister Cooper ta felisitá pueblo di Kòrsou: ‘pabien ku un área mas kompletamente iluminá ku nos tur por disfrutá di dje!’
