Publiká riba 17 Novèmber 2022
Willemstad – Dia 4 desèmber 2022, nos Sentro di Siudat ta kumpli 25 aña riba Lista di Patrimonio Mundial di UNESCO. Den e kuadro aki, Ministerio di Tráfiko, Transporte i Planifikashon Urbano (VVRP), a lansa un página di facebook komo un evento titulá Willemstad 25. Un invitashon ta bai na komunidat pa buska e evento riba facebook pa por tuma nota di e programashon pa huntu nos selebrá.
Den kuadro di e selebrashon, Gobièrnu di Kòrsou huntu ku e distritonan di Punda, Pietermaai, Scharloo i Otrabanda ta bai festehá ku diferente aktividat den nos sentro di siudat.
Riba 14 novèmber 2022, a lansa e página di evento Willemstad 25. E página ta aksesibel via kanalnan di facebook. Riba e página aki, por mira e diferente aktividatnan den nos sentro di siudat.
Pa mas informashon por tuma kontakto ku e tim organisatorio di VVRP na 511-3874 òf manda un e-mail na info.vvrp@gobiernu.cw.
