Notisia

Minister Croes ta firma akuerdo pa halsa

kalidat di infrastuktura digital di tur skol supsidiá pa Gobièrnu

 WILLEMSTAD – Desaroyo i infrastuktura digital ta di importansia pa un nashon su desaroyo duradero speshalmente den e área di enseñansa. Pa e motibu akí na nòmber di Gobièrnu di Kòrsou, Minister di Enseñansa, Siensia, Kultura i Deporte (ESKD), sr. Steven Croes, a firma un akuerdo ku Digicel Business Solutions pa promé parti di e proyekto di digitalisashon di enseñansa. E proseso di digitalisashon ta pa konektá tur skol riba un infrastruktura optimal, pone internèt i aktivá un servisio sentral di informashon i data di manera ku ta halsa kalidat di infrastuktura digital inkluyendo suministro di internèt pa tur skol supsidiá pa Gobièrnu.

Gobièrnu a instituí un tim di trabou ku ta enkargá ku ehekushon di e programa di digitalisashon di e sektor di enseñansa pa Kòrsou.  E plan di digitalisashon ta keda ehekutá den diferente fase i e promé parti akí ta pa pone un infrastuktura optimal i stabil na tur e 118 skolnan supsidiá pa Gobièrnu di Kòrsou. Pa loke ta trata e promé fase, konforme e prosedura di ‘good corporate governance’, e tim a traha un Terms Of Reference (TOR) i a tene un destaho, den kual e dos kompania ku tin na Kòrsou ku ta ofresé internet i infrastruktura di IT lokal a partisipá.  A base di e kriterionan stipulá huntu ku vèlt di enseñansa den e TOR, Digicel Business a skor mihó i a gana e destaho. E kriterionan tabata e.o. speed, preis, kalidat i teknologia . E kompania di Digicel Business a keda skohé komo esun mihó pa huntu ku Ministerio di ESKD digitalisá Enseñansa. Digicel ta bai hasi entrega di tablet/device nan na diferente skolnan.

E proyekto akí ta kanando konforme e Plan Nashonal di desaroyo pa pais (NDP) i tambe konforme e maneho duradero pa ku infrastrukura i konosementu di e filosofia ‘Smart Nation Development’. Struktura di e proyekto akí ta keda ehekutá kaminda Informashon i Teknologia di Komunikashon (ICT) ta bira e base den e proseso di digitalisahon. P’esei a skohe un modelo moderno kaminda ta traha konforme 4 pilar importante (building blocks) den kuadro di desaroyo duradero di enseñansa pa ku digitalisashon. E pilarnan ta konsistí di Vishon, Ekspertisio, Kontenido/Aplikashon i Infrastruktura.  Esaki nan tur ta e base pa por kuminsá ehekutá e proyekto akí den skolnan. E kuater pilarnan aki ta importante i mester keda desaroyá konforme avansenan moderno pa por tin un implementashon eksitoso den e infrastruktura di ICT pa tur e fasilidatnan na e skolnan.

 Huntu ku e trayekto akí ta bai tin mas trayekto paresido den e dianan ku ta bin, despues ku Minister Steven Croes firma mas akuerdo pa ku e trayekto di digitalisashon. Áreanan di enseñansa ku tambe ta haña atenshon den esaki ta e sistema di atministrashon di alumno (Leerlingvolgsysteem/LVS) i – tambe ku mira pa un futuro digitalisá – Enseñansa Liber Kòrsou (ELK).

 Tur esakinan ta trayektonan ku ta kuadra ku e programa di gobernashon 2017-2021 i ta keda ehekutá pa adelanto di nos Enseñansa. Minister Steven Croes ta sumamente satisfecho ku e logro akí pa e desaroyo duradero di Enseñansa.

 **riba e fotonan athunto por tum nota di e momentu ku Minister S. Croes i direktor di Digicel sr. R.van der Hoeven ta firma e akuerdo den kompania di e tim di Digicel i direktor di Sektor di Enseñansa i Siensia Sr. W.Kleinmoedig i e team di Gobièrnu.