Publiká riba 27 Yüli 2021
Willemstad – Resientemente AVB (ántes LVV) a risibí un kantidat di 46 kabritu i karné ku a yega Kòrsou for di Merka. Ta trata aki di kabritu i karné di rasa, entre otro Boer Goat i Dorper, i e meta di e atkisishon aki ta pa yuda mehorá e rasa di kabritu i karne aki na Kòrsou di manera ku riba termino mas largu nos mes por produsí mas karni di kabritu i karné lokalmente. Ultimo biaha ku AVB a risibí un kargamentu di kabritu bibu ta 13 aña pasá.
Awor kriadónan di kabritu i karné por trese nan bestianan na AVB pa dèk ku e chubatunan. Kada chubatu ta haña un stal kaminda por pone un máksimo di 10 kabritu ku mester keda 30 dia pa asina por ta sigur ku nan por keda di dèk. Despues di mas òf menos 5 luna e kabritunan aki lo produsí lamchi ku e kriadó di bestia por bende òf mata pa konsumo di karni despues. Pero promé ku tur esaki e animalnan ku a yega ta bai 40 dia den karentena pa ta sigur ku nan ta liber di malesa i despues di 8 pa 12 luna nan ta kla pa dèk.
Riba potrèt por mira mr. Lizaima Da Costa Gomez ku tabata presente den representashon di Minister di GMN dr. Dorothy Pietersz- Janga. Tambe tabata presente dr. Jennyfer Nicolina i Fahruni Thijssen di Asuntunan Veterinario pa chekeo i registrashon ofisial di e animalnan i señornan Gerritson Doran, Sharlon Gabriel i Camilio Dorotea di AVB ku a atendé e parti di transporte.
###
