Publiká riba 19 Ougùstùs 2021
WILLEMSTAD – En konekshon ku e pandemia di COVID-19, Gobièrnu di Kòrsou a aprobá e presupuesto nobo di Curaçao Medical Center (CMC) pa reforsá su ekipo ku un total di 38 persona, ku ta konsistí di 30 zùster / bruder di kuido intensivo i 8 dòkter spesialista. Na promé instante CMC a pidi pa por haña un total di 48 personal adishonal, pero a base di e presupuesto disponibel a baha esaki te ku 38 persona.
Gobièrnu di Kòrsou lo kubri gastu di salario i akomodashon pa e personal akí i alabes gastu di e ‘uitzendbureau’ ku a haña e proyekto akí na su enkargo. Aserka gobièrnu tabatin un reunion bilateral ku VWS (Ministerie van Volksgezondheid, Welzijn en Sport), kaminda Hulanda a indiká ku ta bai pone fondonan adishonal disponibel pa yuda karga e gastu di 10 AMI personal. Esaki ta nifiká ku e tim di enfermero ku ya ta dunando sosten na personal di CMC den kuido intensivo, por sigui hasi esaki pa algun siman mas te na momentu ku e tim nobo di 38 persona yega Kòrsou. Esaki ta baha e preshon finansiero ku gobièrnu mester a krea pa yuda CMC ku 2 mion florin.
E fondonan lo keda transferí pa kuenta di CMC den e dianan benidero, di forma ku por kuminsá kontratá e tim nobo i laga e personal bini mas pronto ku ta posibel for di eksterior. E siguiente tabèl ta duna un indikashon transparente di e diferente gastunan relashoná ku e trayekto akí.
