Publiká riba 11 Ougùstùs 2021
WILLEMSTAD – Den e próksimo dianan, e timnan di bakunashon di e diferente islanan di e parti karibense di Reino, den kolaborashon ku Ministerio di Salubridat Públiko, Bienestar i Deporte (VWS), lo lansa un enkuesta tokante interes pa bakuná. Meta di e enkuesta ta pa formulá strategia ku e timnan di kampaña di komunikashon por usa den e último fase di e trayekto di bakunashon. E enkuesta ta na enkargo di investigadónan lokal, trahando den kolaborashon ku I&O Research.
Na febrüari 2021, a start e promé etapa di e programa di bakunashon kontra Covid-19 riba e islanan BES i e paisnan CAS. Hende di 60 aña òf mas i personal di kuido di salú a bai promé. For di aprel, a amplia e kampaña di bakunashon pa inkluí tur hende di 18 aña òf mas i, for di kuminsamentu di e luna akí, ta bakunando esnan di 12-17 aña tambe. Entre tantu, a atministrá kasi 400.000 bakuna na e habitantenan di e islanan.
Segun kálkulo di RIVM, pa por yega na inmunidat di grupo, awor ku a konstatá presensia di e variante dèlta di e virus na Kòrsou, Aruba, Sint Maarten i Boneiru, mester logra alkansá un nivel di bakunashon di aproksimadamente 75 te 85% di e poblashon total. Te asina leu, no a alkansá e nivel akí (di e poblashon total di 12 aña òf mas, kompletamente bakuná). E timnan di bakunashon riba e isla- i paisnan ta indiká di ta kontentu ku mas investigashon ta tumando lugá pa asina haña un mihó bista tokante e motibu(nan) dikon un sierto grupo no ta deseá di bakuná òf ta duda pa hasi esei, di forma ku esaki por yuda komplementá e maneho di bakunashon òf di komunikashon pa logra oumentá e interes pa bakuná.
P’esei, Ministerio di VWS, den konsulta ku e outoridatnan di salubridat riba e diferente isla- i paisnan di e parti Karibense di Reino, ta bai realisá un investigashon kualitativo na e tres Islanan ABC i Islariba, mediante entrevista den profundidat i entrevista ku grupo di enfoke, tokante e motibunan ku hende tin pa sea bakuná òf nò. Lo duna atenshon spesial na e habitantenan di 12-40 aña. Mas aleu, e timnan di bakunashon riba e isla- i paisnan ta indiká ku no ta tur hende ta presentá pa e di dos dósis. Komo konsekuensia di esei, nan no ta kompletamente bakuná i p’esei no ta óptimalmente protegé kontra enfermedat grave òf morto debí na Covid-19. Ku esei na mente, lo inkluí e punto di atenshon akí tambe den e enkuesta.
E enkuesta lo tuma lugá na kuminsamentu di ougùstùs 2021. Na kuminsamentu di sèptèmber lo presentá e resultadonan na VWS i e timnan di bakunashon di e isla- i paisnan di e parti karibense di Reino. A base di resultado di e entrevistanan den profundidat, e investigadónan lo formulá konseho konkreto di maneho enkuanto kon por logra oumentá e interes pa bakuná den e parti karibense di Reino. Lo tene kuenta ku e sirkunstansianan lokal di kada isla i pais, entre otro, kuantu kapasidat kada tim di bakunashon tin pa por ehekutá e konsehonan presentá.
