Publiká riba 14 Novèmber 2022
Willemstad – Minister Charles Cooper tabata tin un enkuentro di kortesia ku Embahador di Reino Hulandes pa Republika Dominikana, Sr. Frank Keurhorst dia 7 di novèmber 2022. Minister Cooper a hasi uso di e okashon aki pa trese diferente punto di importansia dilanti. Esakinan tabata relashoná ku konferensia titulá Latin America and Caribbean Cyber Competence Centre (LAC4), ku ta tumando lugá aktualmente na Santo Domingo. Kòrsou ta buskando un aliansa ku LAC4.
Gobièrnu di Kòrsou a instituí un grupo pa atendé ku seguridat sibernétiko. E grupo aki ta enkabesá pa Minister Cooper i e meta ta pa krea un struktura di seguridat sibernétiko pa Kòrsou, tantu pa gobièrnu komo pa sektor priva. Ta atendé ku seguridat sibernétiko, maneho sibernétiko, i krimen sibernétiko. E grupo ta konsistí tambe di Minister di Hustisia, Minister di Asuntunan General, i Minister di Gobernashon, Planifikashon i Servisio Públiko.
E promé paso di e grupo lo mester ta pa desaroyá un strategia sibernétiko nashonal i apuntá un outoridat sibernétiko nashonal. Den e kuadro aki, Minister Cooper a bishitá e konferensia CANTO, a reuní ku NCSC, i bishitá e evento HACKSHIELD. I awor, Minister Cooper ta partisipá tambe ta LAC4 na Santo Domingo.
E interes i ambishon ta pa Kòrsou bira un hub sibernétiko di LAC, i pa laga nos sentro di data bira un partner stratégiko di HACKSHIELD na Hulanda. Tur dos e aktividatnan aki lo por tin un spin-off positivo pa Kòrsou.
Pa por logra esaki, lo mester invertí fondonan pa por krea e struktura legal, desaroyá kapasidat, krea konsiensia, i ehekutá e strategia sibernétiko.
E siguiente paso lo ta ku Kòrsou ta aserká Straatsburg pa via di Konseho Europeo, Kòrsou por bira parti di e progrma OCTUPUS. Den esaki ta tene kuenta tambe ku fondonan ku tin mester pa por realisá e SDG’s ku World Bank pa pone na disposishon, entre otro pa subi e resistensia sibernétiko di paisnan
Loke ta importante ta pa Kòrsou tene kuenta, ku apesar di ta un isla chikitu, nos tambe por bira parti di inisiativanan i oportunidatnan internashonal.
