Nieuws

Willemstad – Resientemente sra. Xiomara Mathilda a keda honrá na Hustle University na Atlanta, Georgia komo embahador internashonal. Servisio di Skolnan Públiko ta sumamente kontentu ku e logro di direktor di Prinses  Magrietschool. Ta asina ku e direktor di skol, Sra. Mathilda, den luna di mart a partisipá na un konferensia di Innovative Schools Summit na Orlando. Esaki riba su propio inisiativa i gastu pa e por haña mas konosementu i vishon  kon pa sigui krese i elevá su liderasgo komo direktor di skol Prinses Margriet na Buena Vista.

Na momentu ku sra. Mathilda tabata den eksterior ela inskribí su mes pa e por a sigui un treinen intensivo. Durante e temporada aki sra. Mathilda mester a ehekutá diferente tarea e.o. formulá kiko ta  su vishon i mishon pa enseñansa, duna un bon bista di e retonan ku e tin komo direktor di skol i kiko e pasonan ta ku mester tuma pa atendé ku e retonan aki. Despues di esaki Servisio di Skolnan Públiko a risibí e grato notisia ku sra. Mathilda a ser skohé komo e promé embahador internashonal ku ta haña e oportunidat di por asistí durante un aña na tur evento/ konferensianan i treinennan di Hustle University i tambe a risibí un beka pa e por sigui desaroyá su nivel di liderasgo atraves di e organisashon aki.

Durante e temporada ku ta tras di lomba sra. Mathilda mester a hasi diferente biahe na entre otro Las Vegas,  Washington, Salt Lake City, Savannah Georgia, New Orleans i Mississippi.  Pa kada un di e eventonan e la risibí un tarea pa prepará  un tema i material, ku e mester a presentá na un grupo.

Na momentu ku nos a ser  informá ku sra. Mathilda a logra e beka aki, Hustle University a invitá 10 persona di  Servisio di Skolnan Públiko pa asistí na e homenahe dia 16 di novèmber na Atlanta Georgia. Alabes e grupo ta haña e oportunidat pa asistí na e treinennan di liderasgo ku Hustle University ta ofresé tur aña na e direktornan di skol na Merka i e grupo ta haña un seshon privá kaminda lo elaborá riba e tema “Poverty Mindset”  .

Komo Servisio di Skolnan Públiko nos ta sumamente kontentu ku e oportunidat aki i nos ta bai sigui traha duru pa empoderá i invertí den nos personal.  Alves nos ta felisitá direktor di skol Prinses Margriet sra. Xiomara Mathilda ku e logro di keda honrá komo embahador internashonal.

—

KOMUNIKASHON