Publiká riba 21 Novèmber 2022
Willemstad – Riba djaluna 21 di novèmber, Minister Charles Cooper huntu ku Minister Sithree van Heydoorn a reuní, huntu ku funshonarionan di ambos ministerio, pa trata e tópiko di mantenshon di skolnan. Ministerio di Enseñansa, Siensia, Kultura, i Deporte (OWCS) pronto lo risibí fondonan for di Hulanda pa mantenshon di skolnan aki na Kòrsou.
Den e trayekto aki, aporte di Ministerio di Tráfiko, Transporte i Planifikashon Urbano (VVRP) ta fundamental. Ministernan a deliberá i palabrá riba un struktura kaminda a konsiderá kon e programa aki por kana mas mihó posibel. Tantu VVRP komo OWCS lo forma parti di un ‘stuurgroep’. Un organisashon pa maneho di e programa lo prepará e dokumentonan nesesario pa e ‘stuurgroep’ por tuma desishon riba dje.
Minister Cooper i Minister van Heydoorn a palabrá ku OWCS ta prepará tantu e struktura komo e proseduranan pa VVRP duna su aporte. VVRP lo duna su aporte i ta pidi pa tene kuenta ku sierto skolnan por haña funshon di shèlter tambe.
