Publiká riba 28 Novèmber 2019
Koperashon nesesario pa subi nivel di servisio na e kliente
Leinan di pais ta indiká ku kada minister(io) tin su propio área di responsabilidat. Esaki ta hasi ku un siudadano te ainda mester a kana di lokèt pa lokèt pa bini kla ku un pèrmit. Esaki poko poko pero sigur ta pasando pa olvido ya ku lei ta duna espasio pa diferente ministerio koperá ku otro. Pa esaki ta nesesario pa e ministerionan en kuestion hasi palabrashonnan ku otro.
Ministerio di Gobernashon, Planifikashon i Servisio tin un ròl importante pa loke ta e nivel di dunamentu di servisio na komunidat. ‘Vergunningenloket’ ta un piesa importante den e esfuerso aki. ‘Vergunningenloket’ ta fungi komo esun instansia na kua komunidat mester akudí pa tur asuntunan ku tin di haber ku pidimentu di pèrmit. Vergunningenloket nan su turno ta atendé ku e ministerio ku ta responsabel pa evaluá i kontestá e petishon. Esaki ta rekerí un koperashon estrecho entre ‘Vergunningenloket’ (front office) di un banda i e ministerionan responsabel pa e atendementu ku pèrmit (back office) di otro banda. E akuerdo di koperashon aki ta un asina yama ‘Service Level Agreement’ (nivel di servisio).
Koperashon entre ministerio GPS i MEO
Minister di Gobernashon, Planifikashon i Servisio, señor Armin Konket, i Minister di Desaroyo Ekonómiko Minister, señora Giselle Mc. William, a sera un kombenio den kua ta palabrá e forma riba kua e dos ministerionan ta traha huntu pa brinda e mihó servisio posibel na komunidat pa loke ta trata e pèrmitnan ku e ministerio di Desaroyo Ekonómiko ta responsabel p’e. Den e kuadro aki a simplifiká prosesonan pa e kliente loke ta fasilitá e servisio.
Riba e foto Minister BPD Minister Armin Konket, Minister MEO Giselle Mc William, Direktor di Lokèt di Pèrmit Shumiré Johannes, Christina van der Biezen (MEO).
Lista di pèrmitnan
E lista di pèrmitnan ku MEO ta responsabel p’e i ku mester keda pidí na Vergunningenloket ta e siguientenan:
| 1. Vestegingsvergunning | 9. Restaurant A Vergunning | |
| 2. Directievergunning | 10. Restaurant B Vergunning | |
| 3. E-zone vergunning | 11. Koffiehuisvergunning | |
| 4. Ventvergunning | 12. Bierhuisvergunning | |
| 5. Standplaatsvergunning | 13. Slijterijvergunning | |
| 6. Bioscoopvergunning | 14. Grosiervergunning | |
| 7. Hotelvergunning | 15. Logementvergunning | |
| 8. Ijshuisvergunning | 16. Societeitsvergunning |
Kontenido di e akuerdo
Kada produkto ku keda inkorporá den e sistema di Vergunningenloket ta rekerí su propio Service Level Agreement. E meta ta pa krea e klaridat nesesario entre ámbos partido. Den e akuerdo ta deskribí tareanan ku Front-Office (Vergunningenloket) tin ku hasi pa e Back-Office(MEO). Den e mes un akuerdo tin tambe loke ku Back-Office tin ku tene su mes n’e pa salbaguardiá e kalidat di e dunamentu di servisio. Den e akuerdo tin deskribí tambe kuantu ta e tempu máksimo ku atendementu ku kada un di e pèrmitnan lo por tuma.
E kliente mester kòrda tambe ku e mester entregá tur tur su rekisitonan pa e petishon por kuminsá su proseso. Esaki ta nifiká ku kada persona ku ta hasi petishon pa un di e pèrmitnan aki por hasi esaki ‘online’, na telefòn òf na lokèt di pèrmit. Pa mas informashon por tuma kontakto via 0800-1515, 433-3123 Fax 433-3100 òf via di e website www.gobiernu.cw.
