Publiká riba 18 Mart 2021
WILLEMSTAD – Riba djaluna 15 di mart 2021 e promé módulonan di e sistema integrá nobo di ICT di Servisio di Impuesto Kòrsou a bai “live”. “Ku e lansamentu akí a logra un stap hopi importante pa modernisá e organisashon di Servisio di Impuesto i hib’é na un nivel mas haltu”, segun Minister di Finansa, señor Kenneth Gijsbertha.
Modernisashon di Servisio di Impuesto i desaroyo di servisio na kliente i digitalisashon a kondusí ku e sistema aktual no ta kumpli mas na e eksigensianan. E sistema di ICT ta un parti hopi importante di e base pa desaroyo di e organisashon. Tambe Minister di Finansa ta duna di konosé ku realisashon di e sistema integrá lo duna mas kontenido na e vishon i strategía pa integrá Servisio di Impuesto, Ontvanger i Stichting BAB den un organisashon nobo.
Integrashon di e Sistema di Servisio di Impuesto i Ontvanger ta forma punto di salida pa un sistema nobo yamá Multi Tax System (MTS). Danki na e integrashon ku for di awor den un atministrashon personal nobo, ta pone tur informashon korektamente den fail di e kontribuyente di manera ku por prosesá informashon mas rápido.
E kambio ta dirigí prinsipalmente riba automatisashon di proseso den Inspekshon di Impuesto (“Inspectie der Belastingen”). Lansamentu di e sistema ta un stap hopi importante pa fasilitá i duna mihó sosten na nos empleadonan di manera ku e trabou hasí lo ta mas efisiente i ku mas fasilidat. Implementashon di e módulo nobo pa loke ta trata impuesto riba entrada (IB) ta hasi posibel pa outomátikamente prosesá e deklarashon entregá basá riba kriterio predeterminá. Esaki ta nifiká ku ta aselerá e proseso pa atendé deklarashon i ku e empleado por duna mas atenshon na kasonan kompleho i kompliká.
“Loke ta mas importante ta e echo ku e kontribuyente finalmente lo benefisiá di e renobashonnan”, Minister di Finansa ta bisa. “E benefisio ta ku por prosesá e deklarashon mas lihé ku ta pone ku a largo plaso lo por saka mas benefisio for di e sistema nobo, banda di e fasilidat di ta “online”. Por ehèmpel, por depositá restitushon mas lihé riba kuenta bankario.”
Ta manehá introdukshon di e sistema nobo ku koutela i e ta tuma lugá stap pa stap.
Aktualmente e sistema ta suministrá e proseso di impuesto di entrada for di 2019. Mas despues den e aña akí lo integrá otro tipo di impuesto, manera Impuesto di Ganashi (WB) i Impuesto di Salario (LB). Loke tambe ta planifiká riba término kòrtiku ta pa outomatisá e sistema di Ontvanger. Lo remplas’é pa e módulo “Multi Collection Solution (MCS)”, kual
lo integrá kompletamente ku e sistema nobo di Multi Tax System. Anteriormente na aña 2019 un portal nobo a keda lansá ku pantayanan mas mihó, den kual e kontribuyente por hasi su deklarashon di impuesto online mas mihó i digitalisá.
Na 2016, Ministerio di Finansa a kuminsá ku e proyekto pa krea i implementá e sistema. For di e momentu ei, e proyekto a pasa dor di algun retraso i vários kontratempu. Na 2019, Ministerio di Finansa a forma un tim di proyekto nobo, dirigí pa Minister di Finansa i señora Ersilia de Lannooy, Sekretario General interino. Esaki a resultá den implementashon eksitoso di e promé módulo. Tantu e “Multi Tax System” (MTS) implementá na Inspekshon di Impuesto, komo e “Multi Collection System” pa Ontvanger a keda desaroyá dor di BearingPoint, un kompania local di ICT.
“Nos ta pará ahinda na komienso pa traha na un manera integrá. Serivisio Online a keda poné komo e prioridat di mas haltu. Ku e sistema nobo akí nos por logr’é, e ta hasi suministro di informashon efisiente, kompleto i aksesibel; kompletamente den liña di ambishon di Ministerio di Finansa. E logro importante akí lo no ta posibel sin e esfuerso di nos empleadonan di e diferente organisashonnan di impuesto i tambe e team di proyekto. Danki, un biaha mas”, Minister di Finansa ta konkluí.
