Publiká riba 02 Desèmber 2020
E mainta a keda habrí pa direktor di Sektor di Enseñansa i Siensia sr. Wladimir Kleinmoedig, kende a yama nos sektor di Enseñansa pabien i alabes a yama Minister Croes bon biní komo minister den e sektor. Na mes momentu a sa di para ketu na e balansa ku nos mester tin huntu den enseñansa pa por sigui traha na bienestar di nos muchanan. Sr. Darius (Lio) Plantijn a felisitá e sektor i a para ketu reflekshonando riba e hecho ku komo organisashon Sitek a kumpli 47 aña awe. Ela dialogá for di e perspektiva di esfuerso teniendo kuenta ku e tópiko i a elaborá riba esaki kaminda kada hende mester hasi na máksimo pa logra bienestar kompletu. Sra. Marilyn Overman a hiba palabra na nòmber di tur e direktivanan di skol i a elaborá tambe riba e tema saliendo for di e perspektiva di komprenshon pa e edukadó.
Minister di ESKD sr. Steven Croes a hiba palabra i a indiká ku e trahadó di enseñansa mester traha den un ambiente trankil, seif i agradabel. P’esei e ta fokùs riba e ambiente pa esaki por ta moderno, agradabel, seif i na òrdu, ya ku e ambiente na skol ta parti integral di bienestar. Dokter sra. M. Arias a elaborá riba e balansa ku nos mester tin pa por funshoná optimal den e tempunan difísil. Sikólogo sra. I. Constancia a para ketu na e manera kon pa ekipá nos mes pa manehá stress den pandemia. Eksperto den Idioma sra. Christine Jernigan a elaborá riba un investigashon hasí na Kòrsou pa ku e tema “Free-to-the public Immersion English School Curaçao”.
Durante di e reflekshon a presentá vários video di aktividatnan na skolnan kaminda por a tuma nota di enseñansa den moveshon. Tambe a presentá SIGE (Sentro pa Inovashon i Guia Edukashonal) su Webcademy ku ta un plataforma digital pa alumno, dosente i mayor.
Por mira bèk riba un mainta eksitoso kaminda Ministerio di ESKD a reflekshoná i duna kontenido via di e kanal virtual na nos Dia di Enseñansa. Riba e facebook di Ministerio di Enseñansa, Siensia, Kultura i Deporte por tuma nota di e presentashonnan i tambe un video di hinter e aktividat.
Klek riba e link:
Diskurso Minister Croes pa Dia di Enseñansa
Presentatie_Balansa den tempunan di Covid. 1 12 2020
Maneha Stres di Covid_dia di Ensenansa_Ijolene Constancia (1)
Video Nildo Pinto (Brievengat)
— riba e potrètnan athunto por tuma nota di e mainta i tambe di un bishita di Minister Croes na e skol sekundario Juan P. Duarte VSBO.