Notisia

WILLEMSTAD – Riba promé dia di skol di aña, Minister di Enseñansa, Siensia, Kultura i Deporte (ESKD) Sr. Steven Croes a hasi bishita na e skol di Fundeshi Johan van Walbeeck. Intenshon di su bishita tabata pa habri aña eskolar huntu ku muchanan i dosentenan pa deseá nan un felis aña i alabes tuma nota di e ambiente eskolar na e skol di fundeshi akí.

Tabata un mainta ameno, kaminda apesar di e awaseru e muchanan i maestronan ku hopi entusiasmo a risibí minister bou di ‘overdekte’.  Minister a deseá tur mucha un bon aña i tur kos bon pa sobrá di e aña eskolar akí.  Minister tambe a konsehá tur e muchanan pa dediká sufisiente tempu na tur tareanan di skol, stima nan yùfrou i mener i respetá nan mayornan. Esaki ta kuadra ku Minister su vishon pa enseñansa kaminda ta siña e mucha fo’i chikí (Teach Them Young) e balornan básiko pa pone atenshon na nos normanan i biba den bon ambiente kaminda disiplina, stimashon i union ta e prioridat.

Na mes momentu Minister a konta nan tambe ku e ta un èks alumno di e skol i kuriosamente e muchanan a puntra Minister entre otro: serka kua yùfrou e tabata, ken tabata su mihó amigu i si Minister a yega di haña ‘strafwerk’. Ku plaser Minister a kontestá tur pregunta i na final Minister huntu ku Tio Ali i e muchanan a kanta e kantika “Duna mi dos”, e “jingle” rítmiko ku ta trese e mensahe kaminda kada persona mester “Duna mi dos” pa no keda kontagiá ku e vírùs di Corona/COVID-19.

E muchanan i maestronan a keda kontentu ku bishita di Minister Croes i na mes momentu Minister tambe a keda hopi kontentu di a bishitá e skol.

**Riba e potrètnan athunto por tuma nota di e bishita na skol di Fundeshi J. van Walbeeck.